Ovo leto bila je jubilarna 10. utrka Istria 100 by UTMB, va sisteme krovne organizacije, a spada va stazi sa tešken i tehnički zahtjevnen terenon. Malo naše lepe obali, stari srednjovjekovni gradići, mitska i predivna Ćićarija, gradska središta, a i puno lepeh panorami.
Morda će se ki pitat kakove to veze ima međunarodna trail utrka „Istria 100 by UTMB“ z nami planinari. Onako na prvi pogled niš, ali va stvarnoste jako puno.
Pasana dva leta bil san volonter na trkah „Istria 100 by UTMB“ na stanice Poklon. Stanica je to na najdužoj i ujedno najtežoj dionice trki od 168 kilometar, ka gre od Labina, Rabca, Plomin luki, Plomina, ispod Sisola do Mošćeničke dragi i preko vrha Učki i cele Ćićarije se do Umaga. Volontiral san na Poklone. Tu trkači, nakon 52 kilometra, malo počinu, ofriškaju i parte po trdoj noće napred prema Brguce.
Početak je petak od 6,00 ur večer do drugi dan subotu 6,00 ujutro. Do te uri mora zadnji trkač prit. Lepo, dinamično, atraktivno more se opisat to vreme ča smo proveli na Poklone. Noć pasa brzo, atmosfera je izvanredna, ekipa uigrana, sakega trkača, i prvega i onega zadnjega se dočeka sa navijanjen. Ali nakon dva leta „moja“ ekipa z PD Lisini malo se zasitila bit va statičnoj pozicije. Odlučili smo se prijavit za volontiranje ko sweeperi. Engleška beseda ka lepo zvuči aš po domaći to znači pometač, odnosno službeni naziv na trke je metla. Zadatak metli je da gredu za zadnjen trkačon od stanice do stanice i uz put pobiraju fluorescentne zastavice ke po noći označavaju stazu, PVC traki keh se stavlja na drva i ako puste kakove smeti na staze.
Prijavil san nas da budemo metle na dionice od Brguca do Trstenika. Otel san baš tu dionicu aš naše matično društvo PD Lisina je već 7 let va Trstenike. Kako prijavi gredu dva meseca prej same trki, nismo zajedno znali dal će nas organizator i prihvatit. Na naše zadovoljstvo javljeno nan je da smo va Team Metle 2023. Igor i ja nismo baš znali ča nas čeka. Jedino je Vesna iskusna metla, uz dva leta volontiranje na starte Istria 100 by UTMB va Lovrane, ona to već par let obavlja na našeh lokalneh trkah naziva Noćna rika.
Petak rano ujutro Vesna Mohorovičić, Igor Peloza i ja šli smo preko Muna na Vodice i Dana do Trstenika da pozdravimo našu ekipu na čelu sa Šefon i ujedno presednikom Društva Roberton Koprivnjakon. Našli smo umornu, ali dobro raspoloženu ekipu. Naravno, glavni zabavljač cele ekipe je Srećko Kinkela, va zadnje vreme zaštitni znak PD Lisini.
Pokle kraće ćakule produžili smo do Brguca, od kuda gre naše metlarenje.

Kompletan tekst nalazi se u PDF-u.

(tekst i sliki: Miloš Vrenc)